Fab Lab Austurland opnar í haust

Lilja Jóhannesdóttir, verkefnastjóri Fab Lab Aust.

Fab Lab (Fabrication Laboratory) er stafræn smiðja með tækjum og tólum til að búa til nánast hvað sem er. Hún gefur ungum sem öldnum, einstaklingum og fyrirtækjum, tækifæri til að þjálfa sköpunargáfuna og hrinda hugmyndum sínum í framkvæmd með því að hanna, móta og framleiða hluti með aðstoð stafrænnar tækni. Það sem er svo heillandi við þetta er að þú getur um  að bil búið til hvað sem er og möguleikarnir eru óendanlegir,“ segir Lilja Jóhannesdóttir, verkefnastjóri Fab Lab á Austurlandi.„Það er mikil umbylting að geta teiknað allt í tölvum. Til að útskýra aðeins betur hvað þetta er, þá má líkja þessu við smíðastofurnar og rafmagnsverkstæðin eins og við þekkjum þau, nema að í dag er allt gert í gegnum tölvu. Til dæmis þegar ég starfaði sem smíðakennari og ætlaði til að mynda að gera sjónvarpsskáp, þurfti ég að teikna allt upp og það var gert með blaði og blýanti. Í Fab Lab sest ég hinsvegar bara niður fyrir framan tölvu og teikna allt upp í „Google sketchup“ og set svo efniviðinn í stóra fræsarann og fæ allt í réttum stærðum út,“ segir Lilja.

Dáist að frumkvæði Verkamenntaskólans

Fab Lab á Íslandi er rekið af Nýsköpunarmiðstöð Íslands og eru nú þegar til staðar fjórar Fab Lab smiðjur; í Vestmannaeyjum, á Sauðárkróki, Ísafirði og í Reykjavík. Verkmenntaskóli Austurlands er eigandi smiðjunnar Fab Lab Austurland og átti frumkvæði að stofnun hennar en alls koma þrjár stofnanir að verkefninu á Austurlandi: Nýsköpunarmiðstöð Íslands, Verkmenntaskóli Austurlands og Austurbrú. Alls kostar verkefnið um 20 milljónir króna og fjármagnar VA það auk styrkja frá sveitarfélaginu Fjarðabyggð og fyrirtækjum á svæðinu.
„Þetta er ótrúlega flott framtak og er algerlega að frumvæði Elvars Jónssonar skólameistara. Hann kom til okkar kennara í fyrra og viðraði við okkur þessar Fab Lab pælingar, fékk okkur í lið með sér og keyrði þetta á flug og lét ekkert stoppa sig. Ég hreinlega dáist að frumkvæði Verkmenntaskólans.“

Ekki bara fyrir nemendur

Í starfsemi Fab Lab smiðjunnar verður sérstök áhersla lögð á að auka og efla áhuga ungmenna á tæknimenntun sem og að virkja nýsköpunarkraft unga fólksins í samstarfi við skólana á svæðinu. Starfsemin er þó ekki eingöngu ætluð nemendum því einstaklingar og frumkvöðlar geta einnig fengið aðstoð við hönnun og framleiðslu í smiðjunni. „Það er í raun lykilatriði til þess að Fab lab megi í rauninni heita Fab Lab og standi undir nafni, að stofan sé opin almenningi. Þess vegna verður boðið upp á námskeið í Fab Lab fyrir einstaklinga úr atvinnulífinu og á vorönn 2015 verður boðið upp á áfanga í nýsköpun við Verkmenntaskólann í tengslum við Fab Lab. Svo þegar Fab Lab smiðjan verður svo komin í fullan gang verður boðið upp á  opnunartíma fyrir almenning. ,Þetta er svo spennandi og við erum full eftirvæntingar fyrir þessu verkefni. Okkur finnst þetta ákveðin tímamót í sögu skólans og við hlökkum til að sjá hvað þetta leiðir af sér,“ segir Lilja að lokum.
Formleg opnun smiðjunnar verður á Tæknidegi fjölskyldunnar í Verkmenntaskólanum 8. nóvember.

Grein úr Austurglugganum frá því 12.sept. 2014 (34.tbl.-13.árg.)