Tæknidagur fjölskyldunnar 2014

Frá Tæknidegi fjölskyldunnar 2013

 Tímasett dagskrá: http://www.austurbru.is/static/files/PDF/2014/dagskra_takenidags_timasett.pdf

 Fréttatilkynning                                                                                                         

Tæknidagur fjölskyldunnar 2014:

Nýjasta tækni og vísindi á Austurlandi

Tæknidagur fjölskyldunnar verður haldinn í Verkmenntaskóla Austurlands laugardaginn 8. nóvember. Í ár markar þessi dagur tímamót í menntunar- og nýsköpunarsögu Austurlands því „Fab Lab Austurland“ verður formlega opnað.

Þetta er í annað sinn sem Austurbrú ses. og Verkmenntaskóli Austurlands taka höndum saman og skipuleggja dag sem vekur athygli á fjölbreyttum, heillandi og áhugaverðum viðfangsefnum í iðnaði, tækni og raunvísindum í fjórðungnum.

Tæknidagurinn í fyrravor tókst með eindæmum vel en um fimm hundruð manns heimsóttu skólann og óhætt að segja að mörgum hafi komið á óvart hversu spennandi starfstækifæri eru í boði fyrir ungt fólk sem ákveður að leggja fyrir sig iðn,-tækni og/eða vísindanám. Eitt meginmarkmiðið með Tæknidegi fjölskyldunnar er einmitt að vekja athygli á mikilvægi slíkrar menntunar fyrir samfélagið okkar.

Tæknidagur fjölskyldunnar 2014 verður með svipuðu sniði og í fyrra. Fjöldi fyrirtækja á Austurlandi sýnir allskyns tæknilausnir, gestir fá að kynnast stjörnum himingeimsins og forritunarsmiðju, þeir fá að fylgjast með krufningu á ref, vísindatilraunum leikskólakrakka svo ekki sé minnst á Vísinda-Villa sem fer á kostum eins og hans er von og vísa. Þá fá gestir að sjá hvernig gítarar eru smíðaðir, hvernig varmadælur og vélarrúmshermar virka og margt, margt fleira.

Tæknidagurinn í ár markar tímamót í menntunar- og nýsköpunarsögu fjórðungsins því „Fab Lab Austurland“ verður formlega opnað á þessum degi. Fab Lab (Fabrication Laboratory) er stafræn smiðja með tækjum og tólum til að búa til alla skapaða hluti. Hún gefur fólki tækifæri til að þjálfa sköpunargáfuna og hrinda hugmyndum sínum í framkvæmd með því að hanna, móta og framleiða hluti með aðstoð stafrænnar tækni. Í starfsemi Fab Lab smiðjunnar verður sérstök áhersla lögð á að auka og efla áhuga ungmenna á tæknimenntun sem og að virkja nýsköpunarkraft unga fólksins í samstarfi við skólana á svæðinu. Starfsemin er þó ekki eingöngu ætluð nemendum því einstaklingar og frumkvöðlar geta einnig fengið aðstoð við hönnun og framleiðslu í smiðjunni.

Tæknidagur fjölskyldunnar hefst klukkan 12:00 og eru allir velkomnir.

Myndatexti: Börn gera efnafræðitilraunir á Tæknideginum í fyrra.

Nánari upplýsingar um Tæknidag fjölskyldunnar veita Elvar Jónsson, skólameistari VA, í síma 869 5494 og Lilja Guðný Jóhannesdóttir hjá Austurbrú í síma 848 3607.