Verknámsvika VA og Vinnuskóla Fjarðabyggðar

Verkmenntaskóli Austurlands (VA) og Vinnuskóli Fjarðabyggðar hafa efnt til samvinnuverkefnis sem gefur nemendum Vinnuskólans kost á að kynna sér iðnnám í VA  í eina viku á launum í byrjun júní. Verkefnið er ætlað nemendum í Fjarðabyggð sem hefja nám í  10. bekk að hausti.

Með því að nemendur vinni verkefni á verkstæðum skólans má ætla að þeir fá betri kynningu á iðnnámi. Þar með verði þeir líklegri til að mennta sig til starfa sem henta t.d. í sjávar-, iðn- og tæknifyrirtækjum.

Þessa viku  í Vinnuskólanum gefst nemendum kostur á að kynna sér það iðnnám sem þeir vilja og er kennt í VA. Nemendur munu leggja stund á þá iðngrein í eina vinnuviku, 4 tíma á dag í byrjun júní. Í lok vinnuviku verður uppskeruhátíð með sýningu á verkefnum nemendanna.

Í VA er hægt að stunda nám á 4 iðnbrautum, grunnnám málm- og véltæknigreina, grunnnám rafiðna, hársnyrtibraut og grunnnám bygginga- og mannvirkjagreina. Í framhaldi er hægt að stunda nám í vélvirkjun, rafvirkjun og húsasmíði.

Fyrirtæki í Fjarðabyggð taka myndarlega þátt í verkefninu með fjárstuðningi. Án þess stuðnings hefði verkefnið tæplega orðið að veruleika. Þessi fyritæki eru Alcoa Fjarðaál, Eskja, G.Skúlason, Loðnuvinnslan, Launafl, SVN og VHE vélaverkstæði.