Fréttir

Skrifstofa skólans hefur verið opnuð eftir sumarleyfi. Getum tekið við nemendum á flestar brautir skólans en nánari upplýsingar veitir áfangastjóri í síma 4771620 eða á bobba@va.is . Einnig laus pláss á heimavist.

Verkefni nemenda á 4.önn í húsasmíði var að byggja vallarhús fyrir Norðfjarðarvöll. Verkefnið er unnið í samstarfi við Fjarðabyggð. Í myndasafninu eru myndir frá því þegar húsið var híft út úr verknámshúsinu í síðustu viku.

Á föstudaginn lauk verknámsviku VA og vinnuskóla Fjarðabyggðar en í henni fá 15 ára unglingar í vinnuskóla Fjarðabyggðar að kynnast verknámi í VA. Þetta er í fjórða sinn sem Verknámsvikan er haldin og tókst hún mjög vel. Vikan er samvinnuverkefni Fjarðabyggðar og VA. Unglingarnir voru ánægðir með vikuna og þau verkefni sem unnin voru. Í verknámsvikunni fá nemendur að kynnast tveimur smiðjum á fjórum dögum og fimmti dagurinn er svo fræðsludagur þar sem unnið er með styrkleika nemenda, áhugakönnun, ýmis störf skoðuð og kynning á ART kennslu. Vikan endaði svo með sameiginlegu grilli þar sem nemenur voru kvaddir eftir góða viku. Markmið vikunnar er m.a. að kynna nemendum fyrir iðn- og verknámi og þeim möguleikum sem námið hefur upp á að bjóða. Í könnun sem gerð var í lok vikunnar kom m.a. í ljós að verknámsvikan hefur haft áhrif á viðhorf unglinganna til iðn- og verknáms á jákvæðan hátt og rúm 86% þeirra geta hugsað sér að stunda það nám í framtíðinni.

Nemendur og starfsfólk starfsbrautar brutu upp hefðbundið skólastarf í maí og tóku upp á ýmsu skemmtilegu. Nemendur fengu fræðslu í myndbandagerð hjá Sigurjóni tölvukennara en auk hans komu gestakennararnir Hlynur Sveinsson sem sýndi hópnum möguleika á notkun dróna og Ásbjörn Eðvaldsson sem er reynslumikill í myndbandsgerð. Svo kíkti hópurinn í sveitina til Dodda og Theu á Skorrastað og áttu þar frábæran dag þar sem þau fengu meðal annars að fara á hestbak. Einnig fór Stefán Már með hópinn upp í skógrækt þar sem nemendur byrjuðu á því að bera timbur í göngustíga. Að því loknu sýndi Stefán hópnum hvernig væri hægt að grilla beint á kolum kjöt, kartöflur, súkkulaðimúffur í appelsínuberki og súkkulaðifyllta banana. Grillaðir voru sykurpúðar og einnig pylsur í deigi auk þess sem hann kenndi þeim að búa til útileguís. Stefán fór yfir mikilvæg atriði í fyrstu hjálp, fór með þeim í skátaleiki og stjórnaði söng. Mikil veðurblíða var þessa daga sem spillti ekki fyrir. Að lokum var ferðinni svo heitið á Mývatn á lítilli rútu. Sú ferð var styrkt af heilsusjóði starfsmanna Fjarðaráls sem kallast Alcoans in motion en starfsmenn Fjarðaráls stóðu fyrir skíðaviðburði til styrktar brautinni. Einnig styrkti Tanni Travel ferðalagið. Markmið ferðarinnar var bæði að fræðast um Mývatn og nágrenni og að eiga notalega samverustundir saman. Fimm nemendur af ellefu á brautinni eru að útskrifast í vor og því var þetta einskonar útskriftarferð. Auk nemenda fóru flestir kennarar brautarinnar og Gunnar Ólafsson jarðfræðingur og kennari í VA en hann hefur farið áður í Mývatnsferðir með nemendur. Í ferðinni var Kröfluvirkjun skoðuð, Fuglasafn Sigurgeirs og Dimmuborgir auk þess sem að hópurinn baðaði sig í Jarðböðunum og snæddi kvöldmat saman og tók ferðin 10 klukkustundir í það heila. Gunnar fræddi hópinn bæði um jarðfræði og náttúru svæðisins. Svo voru þrír gítarleikarar í kennarahópnum og því var sungið í rútunni alla leiðina heim. Skólinn er þakklátur styrktaraðilum fyrir að gera svona ferðir mögulegar en í svona ferðum skapast tækifæri til að fræðast og eiga gæðastundir saman sem eru ómetanlegar.

Verkmenntaskóla Austurlands var slitið við hátíðlega athöfn í 30. sinn laugardaginn 28. maí að viðstöddu fjölmenni í Egilsbúð. Alls brautskráðust 35 nemendur af 10 brautum.

Brautskráning verður í Egilsbúð laugardaginn 28. maí og hefst kl. 14:00.

Árshátið NIVA fór fram föstudagskvöldið 29. apríl og mættu um 100 nemendur auk 20 kennara og starfsmanna á viðburðinn. Dregið var í síðastliðinni viku úr edrúpottinum en nemendur blésu í áfengismælinn eftir að þau mættu á dansleikinn eftir árshátíðina. Alls voru rúmlega 40 nemendur í pottinum. Ölvun var mjög lítil á ballinu og voru flestir nemendur sjálfum sér og öðrum til sóma. Vinningshafar í edrúpottinum eru eftirfarandi: 25.000 kr gjafabréf hjá SÚN – Friðrik Davíð Gunnarsson Sennheiser heyrnatól – Jóna María Aradóttir Gaman er að geta þess að báðir vinningshafar eru meðlimir í edrúfélagi skólans. Við óskum þessum flottu nemendum til hamingju með vinningana og þökkum styrkataraðilanum, sem að þessu sinni var Síldarvinnslan kærlega fyrir stuðninginn við forvarnarstarf skólans.