Fréttir

Stjórn NIVA , nemendafélags VA, hefur sett sér siðareglur. Stjórnin hefur í gegnum tíðina reynt að tryggja að félagslíf skólans henti sem flestum og að skólabragur VA einkennist af virðingu og vináttu. Nú hefur stjórnin tekið stærra skref í þá átt og sett sér skriflegar siðareglur sem hún mun fylgja. Siðareglurnar eru eftirfarandi: Stjórn NIVA leggur sig fram við að: • tryggja að félagslíf skólans einkennist af virðingu, umhyggju, jafnrétti og lýðræði • skipuleggja ekki viðburði sem upphefja félagslega stéttaskiptingu meðal nemenda • fagna nýnemum í skólanum á jákvæðan hátt fyrir alla með uppbroti á skóladegi, hátíð og gleðistund • gæta að jöfnu kynjahlutfalli í stjórn nemendafélags og ráðum og nefndum á þeirra vegum • auglýsingar innan skólans, á Instagram, Snapchat, Facebook og aðrar á þeirra vegum ýti ekki undir staðalmyndir um hlutverk kynjanna, útlitsdýrkun eða fordóma af neinu tagi • hafa að leiðarljósi að ráða ekki skemmtikrafta sem gætu valdið einstaklingum innan skólans vanlíðan eða stuðlað að meiri fordómum eða minni virðingu fyrir ólíkum hópum í samfélaginu • vera fyrirmynd hvað varðar mannvirðingu, jafnrétti og jákvæð samskipti

Íþróttadagurinn í dag heppnaðist mjög vel og var þátttaka góð en um 100 manns tóku þátt. Íþróttaakademína skólans stóð fyrir deginum. Sjá myndir á http://www.va.is/is/skolatorg/myndasafn/ithrottadagur-2014 .

Smellið á fyrirsögnina til að sjá dagskrána.

Föstudaginn sl. lögðu 38 nemendur úr Verkmenntaskólanum af stað í menningarferð ásamt fararstjórn. Var ferðinni heitið norður í land n.t.t. til Fjallabyggðar og Akureyrar. Markmið ferðarinnar var að kynnast nemendum Menntaskólans á Tröllaskaga sem staðsettur er á Ólafsfirði og nýta þá eiginleika sem Akureyri hefur upp á að bjóða í skemmtun og leik. Marian hinn ágæti bílstjóri ferðarinnar renndi með hersinguna í hlað á Ólafsfirði um kvöldmatarleyti og þar beið hópsins pizzuhlaðborð og fulltrúi nemendafélags Menntaskólans á Tröllaskaga ásamt kennara. Saddir og sælir komu Austfirðingar sér fyrir í skólanum sem er til húsa í gamla gagnfræðiskólanum í bænum. Skólinn er ungur að árum, en hann var stofnaður 2011 og eru nemendur um 200. Eftir að hafa komið sér fyrir gerðu nemendur sig klára, voru allir speglar nýttir við málningu og túperingu í anda 9. áratugsins, því nú skyldi halda á ball á Siglufirði. Ballið á Siglufirði var haldið á Allanum sem einu sinni hét Bíó Café. Ballið átti lítið skylt við 9. áratuginn, plötusnúðurinn ruglaðist í ríminu og spilaði tónlist sem verður væntanlega vinsæl um 2080. Allt fór þó vel fram og allir komust aftur í gegnum Héðinsfjarðargöng til svefnstaðar okkar. Laugardagurinn hófst með upprúllun á svefnpokum og pylsum í veitingaskálanum gegnt skólanum. Á leiðinni til Akureyrar var Dalvík heimsótt þar sem ferðalangarnir skoluðu af sér rykið í sundlaug bæjarins og heimsóttu byggðarsafnið þar sem Jóhanni Svarfdælingi er gert hátt undir höfði. Vöktu munir úr eigu Jóhanns risa athygli hópsins auk örlaga hans að vinna sem sýningardýr í Danmörku og Bandaríkjunum. Þegar komið var til Akureyrar um miðjan dag á laugardeginum var fyrsta verk að koma okkur fyrir á Backpackers, sem er farfuglaheimili og kaffihús staðsett við göngugötu þeirra Akureyringa. Eftir það spókaði unga fólkið sig á Akureyri áður haldið var á skauta og í keilu. Þar sýndu menn listir sínar, en þess má geta að farastjórnin hafði mikla yfirburði í keiluspilinu. Um kvöldið var haldið á veitingastaðinn Bryggjuna og borðað lambakjöt og kjúklingur sem fór vel ofan í mannskapinn svo ekki sé talað um eftirréttinn. Síðar um kvöldið fóru flestir í bíó, eftir kvikmyndasýningar mældu sumir götur bæjarins en aðrir lögðust snemma til hvílu. Á leiðinni heim á sunnudeginum var komið við í Jarðböðunum við Mývatn og lét hópurinn þreytuna líða úr sér í náttúrulegu laug þeirra Þingeyinga. Þess má geta að nemendur voru til fyrirmyndar í ferðinni og virtu allir sem einn þær reglur sem fyrir þá höfðu verið settar. Öll ungmennin blésu í áfengismæli bæði kvöldin sem staðfesti að ferðin var með öllu áfengislaus. Fararstjórnin.

Þann 14. október síðastliðinn mættu fimmtán frískir nemendur á stofnfund Edrúfélags VA. Skilyrði fyrir aðild að félaginu er skuldbinding til að mæta allsgáður á viðburði skólans og sýna fram á það með því að blása í áfengismæli sé það í boði. Félagsmenn munu setja sér frekari reglur á næstu vikum. Stofnaður hefur verið hópur á Facebook þar sem nemendur geta skráð sig og haldið utan um samskipti sín á milli. Félagsaðild mun fylgja ákveðin fríðindi en hver þau verða mun hópurinn ákveða í samráði við skólann og NIVA.

Í gær fengum við góða gesti í heimsókn frá Tækniskólanum í Klaksvík í Færeyjum. Um er að ræða 36 nemendur og fimm kennara í húsasmíði, málm- og rafiðngreinum. Gestirnir kynntu sér uppbyggingu námsins í VA í þessum greinum og þá aðstöðu sem í boði er.

Fimmtudaginn sl. stóð nemendaráð skólans í samvinnu við vistarráð að vistargleði sem fram fór í matsal heimavistarinnar. Komu þá saman íbúar heimavistarinnar ásamt öðrum nemendum skólans og brugðu á leik. Vistarráðið sá um skipulagningu á leikjunum og voru þeir frumlegir og fjörugir. Nemendum var skipt í lið og fengu liðin stig fyrir hinar ýmsu þrautir þ.á.m. óvenjulegt boðhlaup með skeiðum, skálum, eplum og þvottabala ásamt sjómann, armbeygjukeppni, kappáti ofl. Keppnin fór að öllu leyti vel fram, en markmið keppenda var að skemmta sér og öðrum. Herlegheitunum lauk síðan með pizzuveislu. Dagurinn heppnaðist vel og vonandi að vistarráðið standi fyrir fleiri samkomum á heimavistinni og lífgi þannig enn meira upp á tilveruna á vistinni.