Fréttir

Nemendurnir 54 í Vinnuskóla Fjarðabyggðar fóru ánægðir og stoltir heim eftir viku vinnu við að kynna sér verknám í VA. Þær eru líka ánægðar í lokin Unnur Ása Atladóttir og Þorbjörg Ólöf Jónsdóttir, tveir af skipuleggjendunum með einn smíðisgripinn.

Í Verkmenntaskóla Austurlands er bryddað upp á merkilegri nýjung vikuna 3. – 7. júní. Þetta er samvinnuverkefni Vinnuskóla Fjarðabyggðar og VA um kynningu á verknámi fyrir grunnskólanemendur. Allir þeir sem luku 9. bekk grunnskóla í Fjarðabyggð í vor og skráðir eru í Vinnuskóla Fjarðabyggðar, hefja vinnuna í Verkmenntaskóla Austurlands. Þar starfa þeir í hópum í fjórum deildum skólans, málm-, tré-, hár- og rafdeildum undir leiðsögn kennara. Á verkstæðunum skapa þeir hluti s.s. ostabakka úr tré og snaga úr málmi sem þeir eiga til minninga. Lokadagur vikunnar er svo uppskerudagur þar sem foreldrum og velunnurum er boðið. Undirbúningur að þessu verkefni hefur staðið frá því að hugmyndin fæddist sl. vor í kynnisferð starfsfólks Verkmenntaskóla Austurlands til Svíþjóðar. Fyrirtæki í Fjarðabyggð styðja við verkefnið fjárhagslega og er verkaskipting milli aðila þessi: Verkmenntaskóli Austurlands skipuleggur verkefnið heldur utan um það og leggur til húsnæðið. Kennarar skólans sjá um kennsluna og allt sem að henni lýtur. Sveitarfélagið Fjarðabyggð greiðir nemendum Vinnuskólans laun og skipuleggur ferðir þeirra. Stuðningsaðilarnir greiða laun kennara, efniskostnað og ferðalög til og frá skólanum. Þau fyrirtæki eru Alcoa Fjarðaál, Eskja, G. Skúlason, Launafl, Loðnuvinnslan, Síldarvinnslan og Vélaverkstæði Hjalta Einarssonar. Það er mikil áhersla á kynningu iðn- og tæknináms í landinu. Þar liggja tækifæri ungs fólks til náms og atvinnu. Fjarðabyggð er mjög öflugt atvinnusvæði ekki síst m.t.t. starfa í iðnaði. Það er von þeirra sem að þessu standa að þessi tilraun skili sér í meiri aðsókn í iðn- og tækninám á komandi árum.

Kappróðurssveit Búlandsins vann frækilegan sigur í kappróðri í flokki landsveita á nýliðnum sjómannadegi. Liðið þótti hafa frábært áralag sem mörg sjómannasveitinn mætti vera fullsæmd af. Varð einhverjum á orði að þar sem uppistaðan í liðinu væri úr Verkmenntaskólanum þá væri ekki hægt að fara fram á minna en góða verkkunnáttu. Búlandið er regnhlífarheiti yfir vísinda- og menntasamfélagið á Júdasarbala og nýverið bættist í þann hóp meira af slíkum sem hafa aðsetur í Steininum. Það má segja að markvissar æfingar hafi skapað þennan frábæra árangur líðsins enda vita sveitarmenn það að árangur byggist á ástunun.

Brautskráning fór fram frá Verkmenntaskóla Austurlands 25. maí í Egilsbúð, Norðfirði. Brautskráðir voru 29 nemar af 11 brautum. Nemendur VA fluttu tónlist, tuttugu og tíu ára afmælisárgangar mættu og fluttu ávörp og í lokin sungu allir viðstaddir lagið Sumarkveðju eftir Inga T. Lárusson við ljóð Páls Ólafssonar. Viðurkenningu hlutu 8 útskriftarnemar ýmist fyrir frábæran námsárangur eða aðra þætti skólastarfsins.