Fréttir

Verkmenntaskóla Austurlands var slitið við hátíðlega athöfn í 28. sinn laugardaginn 24. maí að viðstöddu fjölmenni í Kirkju- og menningamiðstöð Fjarðabyggðar. Alls brautskráðust 36 nemendur af 7 brautum. 12 brautskráðust af félagsfræðibraut, 7 af náttúrufræðibraut, 5 úr rafvikjun, 2 með iðnmeistarapróf í rafvirkjun, 6 úr húsasmíði, 2 af sjúkraliðabraut og 2 af braut fyrir leiðbeinendur í leikskólum. Veittar voru viðurkenningar til nemenda sem hafa skarað fram úr eða náð bestum árangri í einstökum greinum. Róbert Sigurbjörnssson hlaut verðlaun fyrir ágætan námsárangur í húsasmíði. Guðbjartur Freyr Gunnarson hlaut verðlaun fyrir góðan námsárangur í rafvirkjun. Bryndís Aradóttir hlaut verðlaun fyrir ágætan námsárangur í sjúkraliðagreinum. Thelma Rún Magnúsdóttir hlaut verðlaun fyrir ágætan námsárangur á námsbraut fyrir leikskólaliða. Katrín Hulda Gunnarsdóttir hlaut verðlaun fyrir framúrskarandi námsárangur í íslensku. Sigrún Hilmarsdóttir hlaut verðlaun fyrir framúrskarandi námsárangur í félagsfræðigreinum. Katrín Hulda Gunnarsdóttir hlaut verðlaun fyrir framúrskarandi námsárangur í stærðfræði. Katrín Hulda Gunnarsdóttir hlaut verðlaun fyrir framúrskarandi námsárangur í náttúrufræðigreinum. Katrín Hulda Gunnarsdóttir hlaut verðlaun frá Stjórnendafélagi Austurlands verðlaun fyrir framúrskarandi námsárangur í raungreinum. Félagslíf í framhaldsskólum er mikilvægt, bæði fyrir nemendur og skólasamfélagið. Eftirtaldir nemendur hafa starfað dyggilega að félagslífi skólans og sýnt dugnað og ósérhlífni í þágu samnemenda sinna: Andrea Magnúsdóttir Sigrún Hilmarsdóttir Steina Gunnarsdóttir. Við skólann hefur verið starfrækt Listaakademía um nokkura ára skeið. Eins og félagslífið er mikilvægt þá er menningin ekki síður mikilvæg. Listakademían og leikfélagið Djúpið vinna náið saman og setja á hverju ári upp metnaðarfulla leiksýningu. Eftirtaldir nemendur hafa tekið þátt í tveimur eða fleiri leiksýningum og unnið ötullega í listaakademíunni. Aníta Eir Jakobsdóttir Daníel Magnús Bergmann Ásgeirsson Katrín Hulda Gunnarsdóttir Sindri Már Smárason. Að lokum var þremur nemendum veitt viðurkenningu fyrir framúrskarandi námsárangur á stúdentsprófi. Þessir nemendur eru með 9 eða hærra í meðaleinkunn. Katrín Hulda Gunnarsdóttir með meðaleinkunnina 9,62 Smári Björn Gunnarsson með meðaleinkunnina 9,42 Sigrún Hilmarsdóttir með meðaleinkunnina 9,0 Skólinn óskar öllum brautskráðum nemendum skólans innilega til hamingju með áfangann og velfarnaðar í námi, leik og starfi í framtíðinni.

Í dag komu nemendur í 8.bekk úr Grunnskóla Hornafjarðar í heimsókn til okkar í VA ásamt kennurum sínum. Fengu þau kynningu á námsframboði, félagslífi og aðstöðu skólans. Mjög áhugasamir og flottir krakkar. Takk fyrir komuna.

Katrín Hulda Gunnarsdóttir, nemandi á náttúrufræðibraut, hlaut Fulbright styrk á dögunum til að sækja sumarnámsstefnu í umhverfisfræðum. Um fimm vikna námsstefna fyrir unga evrópska leiðtoga er að ræða og verður hún haldin á vegum mennta- og menningarmálaskrifstofu bandaríska utanríkisráðuneytisins í byrjun júlí. Námsstefnan er haldin í Kansas State University. Allur kostnaður er greiddur fyrir þátttakendur (ferðir, uppihald, bækur, tryggingar ofl.). Krefjandi dagskrá verður fyrir nemendur þar sem áhersla er lögð á ábyrgð gagnvart umhverfinu og samfélagsþjónustu, ásamt kynningu á bandarískri menningu og þjóðlífi. Námsstefnan byggir á virkri þátttöku, vettvangsferðum, verkefnum og umræðum. Jafnframt taka nemendur þátt í fjölbreyttri skemmtidagskrá. En hvaða þýðingu hefur þessi styrkur fyrir Katrínu Huldu? Mér finnst þetta bara mjög skemmtilegt og líka mjög gott tækifæri til að kynna mér umhverfismál í heiminum. Einnig að kynnast evrópskri og bandarískri menningu því þetta eru krakkar frá Evrópu sem eru að koma á námskeiðið og svo er það auðvitað í Bandaríkjunum. Gaman að geta nýtt sumarið í að ferðast og fá styrk til þess en samt að læra eitthvað sem getur nýst mér í framtíðinni. Katrín útskrifast í vor af náttúrufræðibraut frá VA en í hvaða nám ætlar hún í framhaldinu? Ég stefni á að hefja nám í líffræði við HÍ núna í haust. Hvað stendur upp úr á þessum þremur árum sem þú hefur verið í VA? Fjölbreytni er það sem stendur upp úr því ég hef áhuga á svo mörgu og ég fékk að gera allt sem ég vildi. Algjör snilld að geta valið þá áfanga sem maður vill vera í t.d. þótt ég sé á náttúrurfræðibraut þá gat ég verið í Listaakademínunni. Starfið í Listaakademínunni var mjög skemmtilegt sérstaklega að taka þátt í uppsetningu á þremur söngleikjum. Heilt yfir er ég mjög sátt við mitt nám í VA og held að það hefði ekki verið betra annarsstaðar. Ég sé ekki eftir því að hafa valið VA á sínum tíma. Til hamingju með styrkinn Karín Hulda og gangi þér vel.

Það verður frí á sumardaginn fyrsta sem er fimmtudaginn 24. apríl. Gleðilegt sumar og takk fyrir veturinn.